Vergilər Nazirliyinin Tədris Mərkəzində "ACCA" sertifikatlaşdırma imtahanları təşkil edilib

2017-09-14 | Sertifikasiyalar | 4505

Sentyabrın 5-də Vergilər Nazirliyinin Tədris Mərkəzi ilə "İmza Group" MMC arasında əməkdaşlıq çərçivəsində "100 uğurlu imza" birgə təlim layihəsi həyata keçirilib.

Nazirliyin Media və Kommunikasiya Mərkəzindən AZƏRTAC-a bildirilib ki, təşkilatlar arasında əldə edilmiş razılığa əsasən, əməkdaşlıq layihəsinin mühüm komponentlərindən biri Tədris Mərkəzində "ACCA" sertifikatlaşdırma imtahanlarının təşkili olub. "ACCA" sertifikat imtahanının ilkin mərhələsində 30 nəfər iştirak edib. İmtahanlar onlayn şəkildə və ingilis dilində aparılıb.

Vergilər Nazirliyinin Tədris Mərkəzi "ACCA" sertifikatlaşdırma imtahanlarının təşkili üçün müvafiq lisenziyaya malikdir və ölkəmizdə peşəkar mühasiblər üçün beynəlxalq sertifikat hesab edilən bu imtahanları təşkil edir.

Tədbirdə qeyd olunub ki, Vergilər Nazirliyinin Tədris Mərkəzi ilə "Imza Group" MMC arasında imzalanmış Memoranduma əsasən, bu qurumlar vergi qanunvericiliyi üzrə təlim materiallarının hazırlanması, vergiödəyiciləri arasında maarifləndirmə işini təşkil etmək üçün tədbirlərin keçirilməsi, müvafiq sahələr üzrə birgə konfrans, seminar, təlim və görüşlərin təşkili və müvafiq sahələr üzrə konsaltinq və digər xidmətlərin göstərilməsi istiqamətində əməkdaşlıq edirlər.

Xatırladaq ki, "ACCA" mərkəzi Londonda yerləşən, 1904-cü ildən bəri fəaliyyət göstərən, müxtəlif dünya ölkələrindən 188 min üzvü olan nüfuzlu bir təşkilatdır. Həmin təşkilatın təşkil etdiyi imtahanlardan uğurla keçmiş şəxslərə verilən sertifikatlar dünya ölkələrinin əksəriyyətində tanınır.

Mənbə: https://azertag.az/xeber/Vergiler_Nazirliyinin_Tedris_Merkezinde_ACCA_sertifikatlasdirma_imtahanlari_teskil_edilib-1090779