İcbari tibbi sığortanın tətbiqinə 2015-ci ildən başlanılacaq

2014-02-28 | Kadr işi | 3008

"Səhiyyənin maliyyələşməsi kökündən dəyişəcək, həkimlərin əmək haqları kəskin artırılacaq"

Azərbaycanda icbari tibbi sığortanın tətbiqinə 2015-ci ildən başlanılacaq.

"Marja" xəbər verir ki, bunu yerli televiziya kanallarından birinə Milli Məclisin Sosial Siyasət Komitəsinin sədir Hadı Rəcəbli bildirib.

"Bu məsələyə nəhayət start verildi. Baxmayaraq ki, uzun müddət bundan əvvəl qanun qəbul edilib. Bu qanunun 3 il gecikməsinin səbəblərindən biri, bütövlükdə səhiyyənin maliyyələşməsi və müəyyən dəyişikliklərin olmasıdır. Səhiyyənin maliyyələşməsi kökündən dəyişəcək",- o deyib.

Hadı Rəcəbli qeyd edib ki, sözün əsl mənasında bu addıımı atmağa cəsarət edən adamlar tapılmırdı: "Bir az burada bürokratik əngəllər vardı, bir az da tənbəllik əlamətləri vardı. Bunlar hamısı aradan qaldırılıb. Düşünürəm ki, bu addımı atandan sonra həkimlərin əmək haqlarını kəskin sürətdə qaldıracağıq".

Qeyd edək ki, 1999-cu ildə qəbul edilmiş "Tibbi Sığorta haqqında" qanuna görə, Tibbi sığorta icbari və könüllü formada həyata keçirilir. İcbari tibbi sığorta dövlət sosial sığortasının tərkib hissəsi olmaqla, icbari tibbi sığorta proqramına müvafiq həcmdə əhalinin tibbi və dərman yardımı almasını təmin edir.

Qanuna görə, icbari tibbi sığorta sistemində işləməyən vətəndaşların icbari tibbi sığortalanmasını müvafiq icra hakimiyyəti orqanları və müvafiq sosial proqramlar çərçivəsində yerli özünüidarə orqanları, işləyən vətəndaşları isə çalışdığı şirkət (hüquqi və fiziki şəxslər) təmin etməlidir.

Xatırladaq ki, Fevralın 21-də Nazirlər Kabinetində Azərbaycan Respublikası Baş nazirinin müavini Əli Əhmədovun sədrliyi ilə səhiyyənin maliyyələşdirilməsinin təkmilləşdirilməsi və icbari sığortanın tətbiq edilməsi məsələsinə dair geniş müşavirə keçirilmişdir.

Müzakirələrdə çıxış edən səhiyyə naziri Oqtay Şirəliyev, maliyyə naziri Samir Şərifov, ədliyyə naziri Fikrət Məmmədov, Dövlət Sosial Müdafiə Fondunun sədri Elman Mehdiyev və digər müvafiq qurumların məsul şəxsləri "Tibbi sığorta haqqında" Azərbaycan Respublikasının Qanununun müəyyənləşdirdiyi vəzifələrin yerinə yetirilməsi üçün görülən işlərdən danışmışlar.

Geniş fikir mübadiləsindən sonra müşavirəyə yekun vuran Baş nazirin müavini Əli Əhmədov ölkədə səhiyyə islahatlarının daha da inkişaf etdirilməsini nəzərdə tutan icbari tibbi sığortanın tətbiq edilməsi sahəsində işlərin daha da sürətləndirilməsinin zəruri olduğunu vurğulayaraq, aidiyyəti qurumlara müvafiq tapşırıqlar vermişdir.

Müşavirədə müzakirə olunan məsələ ilə əlaqədar təkliflər nəzərə alınmaqla xüsusi işçi qrupunun yaradılması qərara alınmışdır.

Mənbə: http://www.marja.az