Vergi ödəmək istəmirsinizsə, sizi filial elan edək

2014-09-04 | İqtisadiyyat | 2737

Yüksək Texnologiyalar Parkının (YKT Park) Bakının Pirallahı rayonunda yaradılmasına baxmayaraq, Azərbaycanın bütün ərazisində yüksək texnologiyalar üzrə layihələr gerçəkləşdirən şirkətlər vergi və gömrük azadolmalarından faydalana bilərlər.

"Marja" xəbər verir ki, bunu Bakıda keçirilən "Azərbaycan rabitə və yüksək texnologiyalar sektoru üçün yaradılmış işgüzar mühit" adlı konfransda çıxışı zamanı rabitə və yüksək texnologiyalar naziri Əli Abbasov bildirib.

Nazir deyib ki, bu, texnoparkların filiallarının yaradılması yolu ilə baş verə bilər.

"Texnoparklar üçün əsasnamədə buna əlavə yollar açılıbdır. Texnoparkların filialları deyilən bir termin var. Əgər layihənizi Azərbaycanın hansısa bir ərazisində yerinə yetirmək istəyirsinizsə, biz həmin ərazini texnoparkların filial elan edə bilərik. Yəqin ki, Mingəçevirdəki Kür zavodu, Yüksək Texnologiyalar Parkının filialı elan ediləcəkdir. Gəncədə yerləşən "Billiur" zavodunun təklifləri qəbul olunsa, oranı da YKT Parkının filial elan edəcəyik. Universitlərin də daxilində texnoparkların yaradılması üzrə təşəbbüslər olur. Biz onları da filial elan edə bilərik. Bu, həmin filiallarda işləyən şirkətlərə texnoparklara verilən vergi və gömrük azadolmalarından faydalanmaq imkanı verəcəkdir".

Qeyd edək ki, Yüksək Texnologiyalar Parkı Bakının Pirallahı rayonunda inşa ediləcək. Bunun üçün Pirallahı rayonunda 50 hektar torpaq sahəsi ayrılıb. YTP-də fəaliyyət göstərən rezidentlərin idxal etdiyi infrastruktur və texnoloji avadanlıqlar ƏDV-dən, eyni zamanda onlar 7 il müddətində mənfəət, torpaq və əmlak vergisindən azad edilir.

Mənbə: http://www.marja.az