Vergi ödəyicisi kimi uçotunda olmayan fiziki şəxs özünə məxsus mənzili digər vergi uçotunda olmayan fiziki şəxsə 12 aylıq müddətə, hər ayı 300 manat olmaqla, kirayəyə verir.

Belə olduqda, tərəflər arasında icarə müqaviləsi bağlanılmalı, icarəyə verən fiziki şəxs vergi ödəyicisi kimi uçota durmalı (VOEN almalı) və icarədən əldə etdiyi illik gəlirdən 14% dərəcə ilə vergini hesablamalıdır:

12 ay * 300 manat * 14% = 504 manat

İcarəyə verən hesabat ilindən sonrakı ilin mart ayının 31-dən gec olmayaraq "Gəlir vergisinin bəyannaməsi"ni vergi orqanına təqdim etməklə həmin müddətdə də hesablanmış gəlir vergisinin məbləğini - 504 manatı dövlət büdcəsinə ödəməlidir.

Vergi ödəyicisi kimi uçotda olan fiziki şəxs (fərdi sahibkar) özünə məxsus avtomobili vergi uçotunda olmayan fiziki şəxsə (sadə vətəndaşa) 12 aylıq müddətə, hər ayı 300 manat olmaqla, icarəyə verir.

Belə olduqda, tərəflər arasında icarə müqaviləsi bağlanılmalı, icarəyə verən fərdi sahibkar icarədən əldə etdiyi illik gəlirdən 14% dərəcə ilə vergini hesablamalıdır:

12 ay * 300 manat * 14% = 504 manat

İcarəyə verən hesabat ilindən sonrakı ilin mart ayının 31-dən gec olmayaraq "Gəlir vergisinin bəyannaməsi"ni vergi orqanına təqdim etməklə həmin müddətdə də hesablanmış gəlir vergisinin məbləğini - 504 manatı dövlət büdcəsinə ödəməlidir.

Vergi ödəyicisi kimi uçotunda olmayan fiziki şəxs özünə məxsus mənzili (və ya yaşayış sahəsini) vergi uçotunda olan fiziki şəxsə(fərdi sahibkara) ofis kimi istifadə məqsədləri üçün 12 aylıq müddətə, hər ayı 500 manat olmaqla, icarəyə verir.

Belə olduqda, tərəflər arasında icarə müqaviləsi bağlanılmalı, icarəçi olan fərdi sahibkar ödədiyi icarə haqqından ödəmə mənbəyində 14% dərəcə ilə vergini tutub dövlər büdcəsinə ödəməlidir:

12 ay * 500 manat * 14% = 840 manat

İcarəyə verən fiziki şəxsə(sadə vətəndaşa) vergi uçotuna durmaq və bəyannamə təqdim etməyə ehtiyac yoxdur.

Vergi ödəyicisi kimi uçotunda olan fiziki şəxs(fərdi sahibkar) ona məxsus qeyri-yaşayış sahəsini vergi uçotunda olan fiziki şəxsə(fərdi sahibkara) anbar kimi istifadə məqsədləri üçün 12 aylıq müddətə, hər ayı 500 manat olmaqla, icarəyə verir.

Belə olduqda, tərəflər arasında icarə müqaviləsi bağlanılmalı, icarəçi olan fərdi sahibkar ödədiyi icarə haqqından ödəmə mənbəyində 14% dərəcə ilə vergini tutub dövlər büdcəsinə ödəməlidir:

12 ay * 500 manat * 14% = 840 manat

İcarə haqqından gəlir əldə edən fiziki şəxslərdən(fərdi sahibkardan) vergi tutulmuşdursa, həmin gəlirlərdən bir daha vergi tutulmur.

Hüquqi şəxs cari ilin əvvəlində icarə müqaviləsi bağlayaraq özünə məxsus qeyri-yaşayış sahəsini fərdi sahibkara aylıq 500 manata 12 aylıq müddətə icarəyə verir. İcarəyə verən hüquqiq şəxs əldə etdiyi gəlirlərdən həmin gəlirin əldə olunması ilə bağlı çəkdiyi xərcləri çıxdıqdan sonra qalan mənfəəti 20% dərəcəsi ilə mənfəət vergisinə cəlb edib dövlət büdcəsinə ödəyir və bunu öz illik mənfəət vergisi bəyannaməsində bəyan edir.

Mənfəət vergisi: 12 ay * 500 manat * 20% = 1 200 manat

Fərdi sahibkar Azərbaycan Respublikasında daimi nümayəndəliyi olmayan qeyri-rezidentdən icarəyə 2 əd avadanlıq götürmüşdür. Hər bir avadanlığın icarə haqqı aylıq 3 000 manatdır. Avandanlıqlardan biri Bakıda, digəri isə Rusiyada istifadə edilir. Fərdi sahibkar qeyri-rezidentə Bakıda istifadə edilən avadanlığa görə aylıq icarə haqqı ödədikdə 3 000 manatdan ödəmə mənbəyində 14% tutub dövlət büdcəsinə ödəməlidir. Rusiyada istifadə edilən avadanlığa görə ödənilən icarə haqqından ödəmə mənbəyində vergi tutulmur.

3 000 manat * 14% = 420 manat

Vergi ödəyicisi kimi uçotda olmayan fiziki şəxs icarə müqaviləsi bağlayaraq özünə məxsus qeyri-yaşayış sahəsini rezident müəssisəyə və ya fərdi sahibkara aylıq 500 manata icarəyə verir. İcarəyə götürən ödəniş etdikdə ödəmə mənbəyindən 14% tutaraq dövlət büdcəsinə köçürür və bəyannamə təqdim edir. Səyyar vergi yoxlaması zamanı müəyyən edilmişdir ki, həmin qeyri-yaşayış sahəsinin aylıq icarəsinin bazar qiyməti 1 500 manatdlr. Belə olduqda, icarə haqqından ödəmə mənbəyinə vergi 1 500 manatdan hesablanacaqdır.

Vergi ödəyicisi kimi uçotunda olan fiziki şəxs icarə müqaviləsi bağlayaraq özünə məxsus mənzili digər fiziki şəxsə aylıq 300 manata icarəyə verir. Lakin, mənzilin icarə haqqının bazar qiyməti 1 000 mantdır. Belə olduqda, icarəyə verilən mənzil sahibkarlıq fəaliyyəti məqsədləri üçün istifadə edilməyən yaşayış fondu olduğu üçün icarə haqqından vergi bazar qiymətinə əsasən deyil, faktiki müqavilədə göstərilən qiymətə uyğun olaraq hesablanacaq.